[Ata (Photo Credit): Brandon Pili - NFL]
NIU IOKA – Sētema 9, 2026. ʻO le vāiaso lenei ʻoleʻā toe ʻāmatalia ai le taʻamilosaga aloaʻia o le Liki Lakapī Aoao i ʻAmerika (NFL).
E 272 taʻaloga ʻoloʻo loma nei i le vā o 32 ʻau tāʻaʻalo a le NFL ma ʻoleʻā faʻaiʻu lenei taʻamilosaga i le Super Bowl LXI ʻoleʻā faʻataunuʻuina iā Fepuari 14, 2027 i le malae taʻalo ʻo le SoFi Stadium i le afioʻaga ʻo Inglewood i Kalefōnia.
ʻO le aso nei e tatala ai le taʻaloga muamua i le vā o le Seahawks ma le Patriots ʻoleʻā faʻataunuʻuina i Seattle i le setete o Uosigitone, ʻo ʻau foʻi ia na tauvā i le Super Bowl lona onosefulu ma ʻo lea taʻaloga sā sola ai le ʻau a le Seahawks ma le siamupini ina ʻua manumālō ai ʻi le Patriots i ʻai e 29 i ʻai e 13.
ʻUa mataʻina lenei faʻamomemoe ina ʻua māimoaina ni tama fānau a le Pasifika e toʻaono sā ʻausia lea tūlaga maoaʻe ʻo le ʻauai i le SuperBowl XV, e aofia ai ma ni alo o Sāmoa e toʻafā, ʻo Brandon Pili, Christian Elliss, Jahlani Tavai, ma Marte Tapu.
ʻO le vāiaso foʻi lenei e ʻāmatalia ai le uluaʻi taʻaloga faʻavāomālō a lenei taʻamilosaga i Melepone, ʻAusetālia i le vā o le San Francisco 49ers ma le Los Angeles Rams i le malae ʻo le Melbourne Cricket Ground i le Aso Tofi nei Sētema 10, 2026 (Sētema 11, 2026 i ʻAusetālia).
ʻUa silia ma le toʻaonosefulu ʻo alo ma tama fānau a le Pasefika ʻua filifilia i ni ʻau e 32 a le NFL, ʻo se tūlaga matagōfie ma le maoaʻe ʻauā le laitiiti o le fuaʻinūmera o tagata Pasefika i le Unaite Setete, e tusa ma le 0.5% o le aofaʻi o tagata ʻoloʻo alaala i ʻAmerika.