I le tōlaulauina o suafa o ē ʻua filifilia i le ʻau a le ʻOlopeleki e fetaui aʻe ma le ʻau mālosi a ʻAialani i le taʻaloga o le quarterfinal i le Aso Toʻonaʻi nei, ʻua iloagōfie ai le lē fofogaina o le suafa o se tasi toa manumanu o le ʻau, le susuga a Mark Teleʻa.
Saunoa le susuga a le Faiāʻoga Ulu, ʻiā Ian Foster, ʻua lē filifilia Teleʻa ina ʻua ia lē faʻamamaluina le vāvāō po ʻo lē tausiaina tulāfono po ʻo tapulaʻa na faʻatūlagaina mo le ʻau (curfew).
"ʻUa ia solia le tulāfono. E leʻo se mea tele, a ʻua lava mo lona lē filifilia mo le ʻau o le vāiaso lenei. E lelei lana toleniga, ʻae ʻua pau lava le mea.
ʻUa musu ona toe saunoa le susuga a Foster i lea matāʻupu ʻae ʻua fesili suʻesuʻe ʻo ia e se tasi o le ʻau tusitala i le taʻiulu o le pulega, pe faʻamata pe e ā le vāʻaiga o se tasi tama taʻalo i le lē tausia o tulāfono, ona tali ai lea Foster e faʻapea,
"E ono taʻu manino ai [le uiga o le tagata] ma mātou te tausisi lava i le mea mātou te talitonu ʻi ai. ʻOu te talitonu e faʻamaonia ai lenei mea i la mātou filifiliga na faia.
Ona lē toe manaʻo ai le susuga a le faiāʻoga ona toe lāgā lenei matāʻupu ʻae ʻua toe fesiligia atili ai e se tasi tusitala le susuga a Ardie Savea, ma ia tali atu ʻi ai:
"Vaʻai, ʻua ʻuma ona saunoa [Foster] ʻi ai. ʻUa pau lava le mea na tupu. Mātou te alolofa ʻi ai [Teleʻa], ʻae na te lē ʻauai ʻi le taʻaloga i le Aso Faraile nei."
Ona muta ai lea le fesiligiaina o le ʻau i lea matāʻupu.